黃大仙區召救護車送院平均54分鐘 議員稱不理想

2023年05月11日 12:43 赞好

醫務衞生局早前回覆立法會查詢，當中提到，過去三年黃大仙區由消防處接獲召喚到救護車抵達醫院急症室嘅平均時間約54分鐘，較全港整體44分鐘長，有議員就話唔理想。

醫療衞生界立法會議員林哲玄話，某啲疾病例如中風、心臟病都有黃金一小時，其他個案要一小時後先可以處理，唔係最理想情況。

佢建議伊利沙伯醫院保留醫療服務，重建之後再集中提供手術、化療等服務，又認為目前基層醫療發展唔係好理想，要盡快推行「一人一家庭醫生」等措施。