財華短評：施政報告建議：撤辣招放寬簽證吸專才 銷案底加建居屋留人才
2022年10月19日 10:11
行政長官李家超將喺下星期發表《施政報告》，經歷兩年幾疫情，香港經濟千瘡百孔，社會目前步入復常之際，唔少市民都期待有更多推動經濟嘅利民措施，特別係疫情與社會事件造成嘅人才流失。
人才係經濟發展嘅根本，香港近年人才流失明顯不過，從社會事件到疫情，無論係政治觀點或無法忍受長時間防疫，有唔少人選擇離開香港，政府目前最重要嘅，除咗令香港復常之外，就係吸引人才。
三年前嘅反修例示威，好多年輕人少不更事，或受社會氣氛影響，參與咗違法活動，最後留有案底，影響搵工嘅機會。但多年過去，如果係痛改前非，政府何不俾一次機會？
政府可以破格推出措施，如果無涉及傷人及情節較輕嘅示威者，又願意真誠悔改，可以向政府申請撤銷有關案底，等依啲年輕人可以重新出發，亦象徵著香港走進新嘅一頁。同時又可以向外界釋放訊息，政府願意接納政見唔同嘅人，減輕社會對立氣氛，或有助吸引一啲暫時選擇離開香港嘅人回流。
現時歐美受通漲困擾，經濟不穩，香港相對地有個比較平穩嘅環境，其實係吸引外地人才嘅最好時機，但係住宿問題成為外地人才來港嘅最大困擾。預期喺加息環境下，經濟步入較差嘅周期，政府好應該檢討樓市辣招，尤甚係要吸引外來人才嘅同時，現時係時候撤銷徵收外地人買樓嘅印花稅。
有消息指，如果海外來港人士買樓後，日後成為永久居民，將退還印花稅，但成為永久居民需要7年，而印花稅金額亦唔低，其實難以吸引到人才。更進一步，應該全面撤銷，甚至係提供更多優惠，當然，都不能夠忽略本地人嘅需要，同時要扣除針對本地人嘅樓市印花稅，等更多人願意喺香港買樓。
而消息又指，政府打算俾知名大學嘅畢業生有18個月求職簽證，無條件來港。但香港最大嘅住屋問題，令唔少人卻步，而依啲剛畢業嘅學生，實在難以負擔香港嘅樓價，政府不妨可以喺住房提供更多幫助，例如興建專才房屋宿舍，俾特別專才可以無憂來港工作。不過，建設需時，政府可以考慮先改建旅館或酒店，等海外人才來港後，可以有兩年住宿期，反正現時未有太多旅客來港，唔洗浪費依啲住房。
另外，政府目前經歷財政低谷，係時候檢討房屋及福利政策，首先，要針對公屋富戶進行排查，嚴格審查資產限制，降低資產上限，趕走富戶，留俾真正有需要的基層居住。其次，政府要加建居屋，放寬白表申請，等更多港人，尤其係工作只有幾年嘅年輕人，可以有上樓嘅機會。
綜援政策都係時候進行檢討，釋放更多人力資源，除咗年老或者傷殘人士外，年輕嘅綜援領取者，應該要加入就業要求，等佢哋從事一啲工作，當然，政府都要協助佢哋重投社會。
香港現時百廢待興，全港市民都期待特首李家超嘅《施政報告》可以大刀闊斧地改革，唔好好似以往只係少修少補，從而為經濟及民生帶黎正面嘅影響。
資深媒體人勞玉儀
