财华短评：施政报告建议：撤辣招放宽签证吸专才 销案底加建居屋留人才
2022年10月19日 10:11
行政长官李家超将喺下星期发表《施政报告》，经历两年几疫情，香港经济千疮百孔，社会目前步入复常之际，唔少市民都期待有更多推动经济嘅利民措施，特别系疫情与社会事件造成嘅人才流失。
人才系经济发展嘅根本，香港近年人才流失明显不过，从社会事件到疫情，无论系政治观点或无法忍受长时间防疫，有唔少人选择离开香港，政府目前最重要嘅，除咗令香港复常之外，就系吸引人才。
三年前嘅反修例示威，好多年轻人少不更事，或受社会气氛影响，参与咗违法活动，最後留有案底，影响搵工嘅机会。但多年过去，如果系痛改前非，政府何不俾一次机会？
政府可以破格推出措施，如果无涉及伤人及情节较轻嘅示威者，又愿意真诚悔改，可以向政府申请撤销有关案底，等依啲年轻人可以重新出发，亦象徵着香港走进新嘅一页。同时又可以向外界释放讯息，政府愿意接纳政见唔同嘅人，减轻社会对立气氛，或有助吸引一啲暂时选择离开香港嘅人回流。
现时欧美受通涨困扰，经济不稳，香港相对地有个比较平稳嘅环境，其实系吸引外地人才嘅最好时机，但系住宿问题成为外地人才来港嘅最大困扰。预期喺加息环境下，经济步入较差嘅周期，政府好应该检讨楼市辣招，尤甚系要吸引外来人才嘅同时，现时系时候撤销徵收外地人买楼嘅印花税。
有消息指，如果海外来港人士买楼後，日後成为永久居民，将退还印花税，但成为永久居民需要7年，而印花税金额亦唔低，其实难以吸引到人才。更进一步，应该全面撤销，甚至系提供更多优惠，当然，都不能够忽略本地人嘅需要，同时要扣除针对本地人嘅楼市印花税，等更多人愿意喺香港买楼。
而消息又指，政府打算俾知名大学嘅毕业生有18个月求职签证，无条件来港。但香港最大嘅住屋问题，令唔少人却步，而依啲刚毕业嘅学生，实在难以负担香港嘅楼价，政府不妨可以喺住房提供更多帮助，例如兴建专才房屋宿舍，俾特别专才可以无忧来港工作。不过，建设需时，政府可以考虑先改建旅馆或酒店，等海外人才来港後，可以有两年住宿期，反正现时未有太多旅客来港，唔洗浪费依啲住房。
另外，政府目前经历财政低谷，系时候检讨房屋及福利政策，首先，要针对公屋富户进行排查，严格审查资产限制，降低资产上限，赶走富户，留俾真正有需要的基层居住。其次，政府要加建居屋，放宽白表申请，等更多港人，尤其系工作只有几年嘅年轻人，可以有上楼嘅机会。
综援政策都系时候进行检讨，释放更多人力资源，除咗年老或者伤残人士外，年轻嘅综援领取者，应该要加入就业要求，等佢哋从事一啲工作，当然，政府都要协助佢哋重投社会。
香港现时百废待兴，全港市民都期待特首李家超嘅《施政报告》可以大刀阔斧地改革，唔好好似以往只系少修少补，从而为经济及民生带黎正面嘅影响。
资深媒体人劳玉仪
